दधिवामनस्तोत्रम्
हेमाद्रिशिखराकारं शुद्धस्फटिकसन्निभं ।
पूर्णचन्द्रनिभं देवं द्विभुजं वामनं स्मरेत् ।।1।।
पद्मासनस्थं देवेशं चन्द्रमण्डलमध्यगं ।
ज्वलत्कालानलप्रख्यं तटित्कोटिसमप्रभं ।।2।।
सूर्यकोटिप्रतीकाशं चन्द्रकोटिसुशीतलं ।
चन्द्रमण्डलमध्यस्तं विष्णुमव्ययमच्युतम् ।।3।।
श्रीवत्सकौस्तुभोरस्कं दिव्यरत्नविभूषितम् ।
पीताम्बरमुदाराङ्गं वनमालाविभूषितम् ।।4।।
सुन्दरं पुण्डरीकाक्षं किरीचेन विराजितम् ।
षोडशस्त्रीपरिवृतमप्सरोगणसेवितम् ।।5।।
ऋग्यजुस्सामाथर्वाद्यैर्गीयमानं जनार्दनम् ।
चतुर्मुखाद्यैर्देवेशैः स्तोत्राराधनतत्परैः ।।6।।
सनकाद्यैर्मुनिगणैस्तूयमानमहर्निशम् ।
त्रयम्बको महादेवो नृत्यते यस्य सन्निधौ ।।7।।
दधिमिश्रान्नकवलं रुक्मपात्रं च दक्षिणे ।
करे तु चिन्तयेद्वामे पीयूषममलं सुधीः ।।8।।
साधकानां प्रयच्छन्तमन्नपानमनुत्तमं ।
ब्राह्मे मुहूर्ते चोत्थाय ध्यायेद्देवमधोक्षजम् ।।9।।
अतिसुविमलगात्रं रुक्मपात्रस्थमन्नं सुललितदधिभाष्डं पाणिना दक्षिणेन ।
कलशममृतपूरं वामहस्ते दधानं तरति सकलदुखाद्वामनं भावयेद्यः ।।10।।
श्रीरमन्नमन्नदाता लभेदन्नाद एव च ।
पुरस्तादन्नमाप्तोति पुनरावृत्तिवर्जितम् ।
आयुरारोग्यमैश्वर्यं लभते चान्नसम्पदः ।।11।।
इदं स्तोत्रं पठेद्यस्तु प्रातःकाले द्विजोत्तमः ।
अक्लेशादन्नसिद्ध्यर्थं ज्ञानसिद्ध्यर्थमेव च ।।12।।
अभ्रश्यामः शुभ्रयज्ञोपवीती सत्कौपीनः पीतकृष्णाजिनश्रीः ।
छत्री दण्डी पुण्डरीकायताक्षः पायाद्देवो वानो ब्रह्मचारी ।।13।।
अजिनदण्डकमण्डलुदेवतारुचिरपावनवामनमूर्तये ।
मितजगत्त्रितयाय जितारये निगमवाक्पटवे वटवे नमः ।।14।।
श्रीभूमिसहितं दिव्यं मुक्तामणिविभूषितम् ।
नमामि वामनं विष्णुं भुक्तिमुक्तिफलप्रदम् ।।15।।
वामनो बुद्धिदाता च द्रव्यस्थो वामनः स्मृतः ।
वामनस्तारकोभाभ्यां वामनाय नमो नमः ।।16।।
।। इति दधिवामनस्तोत्रम् ।।
